«Հայ գիրքը 1801-1850 թթ․» մատենագիտության մեջ (Երևան, 1967, էջ 345) մատենագիտական նկարագրությունը կատարվել է աստղանիշով՝ ընդգծելով, որ մատենագետները այսպիսի հրատարակություն չեն նկարագրել, իսկ գիրքը ֆիզիկապես բացակայում է նախկին ԽՍՀՄ խոշոր գրադարաններում։ Մատենագիտական տվյալը Հ․ Դավթյանը վերցրել է Մեսրոպ Թաղիադյանի «Գեղարվեստական երկեր»-ից (Երևան, 1965, էջ 425, 10-րդ ծանոթագրություն)։
Հնդկահայ տպագրության հետազոտողներից Իրազեկն իր ուսումնասիրության մեջ առանձնացնում է այս երգարանը՝ որպես հասարակության կողմից պահանջված ժողովածու (Իրազեկ, «Պատմութիւն հնդկահայ տպագրութեան», Անթիլիաս, 1986, էջ 348)։ Նա, որպես կազմող, նշում է Մ․ Թաղիադյանին և մանրամասն նկարագրում է բովանդակությունը։
Սույն տպագրության մասին Արսեն Ղազիկյանն իր մատենագիտության մեջ (Հայկական նոր մատենագիտութիւն եւ հանրագիտարան, հտ․ Բ, Վենետիկ, 1909-1912, էջ 297) գրում է , որ իրեն հասանելի օրինակը չունի տիտղոսաթերթ, իսկ որպես հրատարակիչ՝ առանձնացնում է Մ․ Թաղիադյանին։
Մեսրոպ Թաղիադյանի բանաստեղծությունների ժողովածուում («Եղերերգութիւն», կազմ․, ծանոթագր․՝ Մ․ Մկրյան, Թիֆլիս, 1893, էջ 64) հիշատակվում են մեզ հետաքրքրող երգարանի տպագրական տվյալները։
Մատենագետներին առ այսօր անհասանելի այս կարևոր տպագրության եզակի օրինակը պահպանվում է ՀՀ ԳԱԱ Հիմնարար գիտական գրադարանի «Էդգարյան» հավաքածուում։
Սույն օրինակի կազմը վնասված է, դարձերեսին, տիտղոսաթերթին նախորոդող և «Ցանկ»-ին նախորդող դատարկ էջերին առկա են ընդարձակ ձեռագիր հիշատակումներ։ Տիտղոսաթերթը՝զարդափակ, վրան՝ զարդանախշ։ Բնագիրը՝ բոլորգիր, սակայն առկա են նաև նոտրգիր հատվածներ։ Գիրքը մի փոքր վնասված է, սակայն բացակա էջեր չկան։